Day Cody

Nayarin natalosan yo iyan salita no kabat yo so akangawa ed saya a website tan makatalos na sayan salita. Siak si Day Cody, say tua a ngaran ko et R-ndy, simpli ak labat a too. Siak so manaayam ed pangasinan ed Pilipinas, wala la so bainte sinko anyos ko a manbibilay dia ed tapew na dalin. Say rason no akin a pangasinan iya, pian angapo so masyadon makatalos ed arum a pasen odino nawalaan ni ira na effort pian talosan iya. Lapud sayan salita so nibagak labat ed saray totoo a asinger ed siak, kanyan no agka interesado, sempet ka la ed abung yo.

Ipakabat ko labat so sarili’k ed sikayo’n amin. Simpli ak labat a too tan simpli met labat so gabay ko ed bilay ko. Aga ak masyado maniilalo ed ataragey a pilalek ed bilay anggaman wala so pankanawnawa ed sararatan a bengatla. Nayarin ag ak natalosan na dakel a totoo lapud saray gagawaen ko a desisyon et nibasi ed prinsipyo a bebembenan ko. Siak met so mareen a too nagkalautla no agko kabat so katongtong ko, aga ak masyado unaasinger tan mimila ed saray totoo a agko kabat. Balet siak so malastog a wala ed lugar no say kaibak et kabkabat ko lan maong odino no siak so walaan na tiwala ed too, lapud panisyaan ko a saratan a kakaiba so nepeg da kan nakabat pian nibagam no siopa ka ed sikara.

Siak so mahilig ed teknolohiya tan gabay ko a amtaen a naynay so balo iran gadgets diya ed teknolohiya angano angapo iratan ed siak, lapud irap na bilay, nayarin nausar ko iraratan pero agko gawa, noagta gawa na saray kaarok. Gabay ko met nen saman so man kompyuter lapud galaw, balet natan uusaren ko so say kompyuter pian mitongtong ed saray kakaaro’k. Uusaren ko met iya pian naipasabik so saray leksyon a nanaaralan ko pian naamtaan met na arum a totoo.

Gaba gabay ko so manbangat na nanduruma iran leksyon, petepeteg a ibabangat ko so saray nanaaralan ko lapud amtak a makatulong ak met ed arum. Balet, sakey a kabusol na arum a ugali’k et say pagmaliw a pranka ed saray bengatla, tan say ansakit a panagsalita no nipaakar ed disiplina. Balet moryaen ko a saya so pisalamatan da angaman aliwan saya a agew balet ontombok ni a taon. Siak so sakey a managbangat, tan amtak a aya so sankaimportantean a propesyon ed sayan mundo. Aliwa labat a managbangat na impormasyon, managbangat ak met na katuan.

No nipaakar ed pasnok ko, angad sarag ko, aga ak mansalita nagkalautla no gagagalaen na sakey a too, balet so saynangawa na aliwa et say kaarok, ibagak ed sikaton tampol so ginawaan to tan mikareenan ed sikato. Aga ak mahilig a ombawi ed saray totoo a mankakasalanan ed siak, tan pupulyanan ko labat ira ta sikara so makapalek ira labat para ed siak. Balet no sobra la ra, natural labat a ibatikan ko ra odino paalisen ko ra, lapud agko ra sarag a kaiba. Nayarin sikaray malastog a maong kaysa siak.

Istoryaen ko ed sikayo so inpanugaw ko, siak so binmaleg ed mairap labat a pamilya, tan sikami so manaanos pian nabilay. Balet maliket a maong so pamilya a kulaan ko, lapud saray miyembro na pamilyak so sankamaongan a totoo ed sayan mundo. Aliwa a dia labat ed loob na pamilyak, angad saray kakapinsan, tan asinger a kapamilya so maong ed sikami. Angapo so naibagak a aliwa ed pamilya mi lapud sikami so walaan na prinsipiyo a angapo ed arum a pamilya. Maliket ak a walaan ak na pamilya a onya.

Siak so nanaral na elementarya tan high skul dia labat ed lokal tan publiko a eskwelaan. Balet nen kolehiyo ak, siak so nanaral ed pribado a skwelaan ed dagupan, angala ak na vocational course ko tan atan so intuloy ko ed sakey a kurso ed bacherlor. Nen ugaw ak, planok la so manmaliw a managbangat ed eskwelaan, tan atan so agamoran ko. Misalsalamat ak maong lapud say pangarap tan pilpilalek ko ed bilay ko so asumpal ko, kanian say pakatulong ed arum a totoo so gawaen ko pian mas nawalaan na kaaralman a kabaliksan so say panagbilay.

No diad love layf, agko gabay tay aliwan prankaan tan masyadon O.A. a maong, singa samay ekperyensiak nen saman, ta binasted to ak la, tapos kabebekta kasumpal na anem bulan ibaga to a i love you, hehehe, e di siyempre late la a maong. Kanyan aga laingen atuloy. hehehe.

Siak so musikero tan wala ed pusok so musika, dakel so ekperyensiak la ed sayan pamaakaran, sanen adiskobrik so sarilik ed musika, tampol kon inaral so saray nanduruma a instrumento, tan natan aaralen ko so say sampol a instrumento a gabay kon naaralan, agko la balet ibaga ompano ibaga yo a manlalastog ak, on diad tua manlalastog ak, pero no diad pakadisir yo et manlalastog ak la ed sayan dalan, aliwa kayo a maong lapud melag ni labat iya, hehehe. Kwanko met labat, say gabay kon ibaga labat awat yo labat la no anto so inkatook, lapud balansi met tan angapo met so grabe tan seryoson kalastogan a singa saray arum ditan ay, puro dagem labat angapo balet so karga to. Singa samay wadman ed abay na abung mi… balet agko la istoryaen.

Natan kauugip la, insulat ko labat iya lapud angapo so nagawaan ko, kanyan unugip tayo la tan agyo la masyado panisyaan no anto’y imbagak ed pangasinan, say importante itdan yo ak na tiyansa pian nakabat ta kayo a maong a too, tan kabaten yo ak met a bilang okay met a too. Goodnight.